https://www.youtube.com/watch?v=mQQf6f3BBf0
Во раните утрински часови, ураганот Ирма кој ја зафати сојузната американска држава Флорида премина во ураган од прва категорија со ветрови од 85 км /ч.
Претседателот Доналд Трамп донесе одлука на Флорида да се прогласи состојба на природна катастрофа. Досега се потврдени 4 смртни случаи, од кои 2 се полицајци кои помагале.
Според Центарот за урагани соопшти дека во текот на денот се очекува ураганот да го продолжи својот пат кон Томасвил, Џорџија, а неговите ефекти ќе ги почувствуваат и жителите на Тенеси, Алабама, Џорџија и Јужна Каролина.
На Флорида околу 4 милиони луѓе се без струја.
По вчерашниот удар, најголемиот аеродром во Флорида се справува со последиците на ураганот-и не е јасно кога повторно ќе се појави.
Меѓународниот аеродром во Мајами ќе биде затворен денеска понеделникот, поради “значителни оштетувања”, според извршниот директор Емилио Гонзалес.
Ураганот Ирма, исто така, го принуди и забавниот парк Волт Дизни Ворлд да ги затвори вратите, што е шести пат во 45-годишната историја на овој комплекс.
Полицијата во округот Мајами-Дејдс, каде што е воведен полициски час, вели дека досега уапсиле 28 лица за кражби и грабежи.
Најмалку 1 милион луѓе ги напуштија своите домови во Флорида, додека останатите се сместени во 260 импровизирани засолништа.
МНР: Нема настрадани македонски државјани
Амбасадата на Република Македонија во Вашингтон е во континуирана комуникација со надлежните служби во САД и досега нема информации за повредени или загинати македонски државјани во погодените подрачја од ураганот Ирма, соопшти вчера вечер Министерството за надворешни работи.
Претставници од македонската Амбасада во Вашингтон стапиле во контакт со македонската државјанка која престојувала во францускиот дел на островот Сент Мартин, а моментно е евакуирана на безбедно. Во контакт се и со семејството кое се наоѓаше во холандскиот дел на Сент Мартин и кое веќе е евакуирано од островот, се наведува во соопштението.
Се упатува апел за будност и следење на препораките, имајќи предвид дека опасноста од ураганот Ирма се уште не е надмината.
Телефонските броеви за контакт со македонската Амбасада во Вашингтон, на кои може да се обратат македонските граѓани во секое време, се: 202-390-7418 и 202-667-0501.