Со оглед на тоа што се очекува во наредните 10 дена да продолжат високите концентрации на ПМ 10 честичките во воздухот, Министерството за животна средина и просторно планирање денеска објави неколку мерки за кои рече дека ќе ги достави на усвојување во Владата.
Во соработка со единиците за локална самоуправа и министерството за образование , министерот Изаири ќе побара да се донесе одлука за започнување на зимскиот распуст за основните и средните училишта на 28 декември иако распустот официјално започнува ден потоа.
Како што информираше министерот Нурхан Изаири, во соработка со Министерството за здравство треба да се воведе мерка на сите работодавци во градот Скопје и општина Тетово да се ослободат од работни обврски хронично болните, бремените жени и лицата постари од 60 години.
Изаири ќе побара и да се зголеми фреквенцијата на автобуси и да се намали цената на билетот, што тој смета дека би било стимул за користење на градскиот превоз. Тој дополни дека меѓу другите мерки ќе предложи да се сопрат градежните активности и да се ослободат работниците кои работат на отворено.
Во рамките на министерството се предлага град Скопје и општина Тетово да ги интензивираат активностите за чистење на улиците, особено околу градилиштата.
Министерот најави дека во рамките на Комитетот за заштита на животна средина, вечерва дополнително ќе се разговара за воведување на мерката пар – не пар за автомобилите.
Во препораките упатени до граѓаните, Изаири апелира да се користи се почесто јавниот превоз и возилата да не се користат без поголема потреба, како и тоа да не се користи прегорено отпадно масло, лакирани или обоени отпадоци од дрво и мебел, стиропор или гуми за затоплување на домовите.
Тој очекува Владата во рок од еден до два дена да ги усвои овие мерки.
Одговарајќи на новинарско прашање дали овие мерки се задоцнети, министерот вели тоа што мерките се предлагаат сега, не значи дека досега не презеле соодветни мерки.
Од друга страна, активистите повикуваат на масовен протест во понеделник во 17 часот пред Владата, барајќи Владата да преземе итни чекори за да се спречи загадувањето.
Активисти: Дишеме канцероген воздух, повикуваме на масовен протест во понеделник