Во Заводот за рехабилитација во Отешево не се примаат пациенти за болничко лекување поради дефект на водоводната мрежа, тврдат за НОВА граѓани од Ресен. Поради екстремно ниските температури за време на новогодишните празници замрзнале и испукале цевките за вода од старата инсталација на објектот кој не е реновиран со децении.
Информацијата ја потврдија во заводот од каде што велат дека лекарите и медицинскиот персонал прегледуваат пациенти во вонредни услови, а двата оддели за болничко лекување и физикална терапија не функционираат. Пациентите кои се со сериозни проблеми на белите дробови се препраќаат во Битола која е на 45 километри оддалеченост од заводот и во Охрид до каде што треба да патуваат 55 километри.
„„Заради дефектот кој е предизвикан од сибирските температури работиме во вонредни услови. Имавме дефект со цевките кои испукаа, а водата влезе во разводната табла на струјата. Тоа се случи во текот на работното време, така што се интервенираше веднаш и со големи напори дефектот е отстранет. Сега чекаме да се стабилизира ситуацијата и се надеваме дека за една недела ќе почнеме да хоспитализираме пациенти“, изјави за НОВА д-р Даринка Мицевска директорка на Заводот за рехабилитација во Отешево.
Во заводот нема вода, а вработените се топлат на греалки. Во такви услови, каде што медицинскиот персонал не може ниту рацете да ги измијат им се даваат здравствени услуги на пациентите.
Од друга страна, пациентите се револтирани бидејќи во сезона на грип, со температура и компликации се принудени да патуваат со километри за да бидат примени во болница. Некои од нив, особено пациенти со бронхопневмонија кои с е јавија во редакцијата на НОВА, се жалат дека не биле примени ниту во болницата во Битола.
„Не примаат немаат капацитет во болницата во Битола. Со мали деца кои имаат температура но и возрасни од Ресен одиме во заводот за рехабилитација во Отешево од каде што не препраќаат во болницата во Битола. Се малтретираме, патуваме по студот по 50 километри по стариот пат бидејќи другиот го прават. На крај и таму не хоспитализираат“, тврдат за НОВА граѓани од Ресен.
Директорот на болницата во Битола пак, вели дека не е информиран за такво нешто.
„Не ги враќаме. Немам информација дека досега некој е вратен“, кратко одговори Васко Најдовски директор на Клиничката болница во Битола.
Заводот за рехабилитација во Отешево е во очајна состојба. Зградите не се реновирани со децении, а две од нив воопшто не се во функција. Во зимскиот период и претходно парното не работело бидејќи установата не е во можност да ги плати режиските трошоци. Така вработените и пациентите се смрзнуваат на греалки.
Во установата велат дека чекаат да дојдат на ред за реновирање на објектите за да се подобрат условите за лекување на пациентите , но и за работа на медицинскиот персонал. Заводот за рехабилитација во Отешево ги опслужува пациентите со белодробни заболувања и е единствен од ваков вид во државата. Установата е оставена на забот на времето иако во него медицинскиот персонал е специјализиран за давање на здравствени услуги од ваков тип.