Во Париз се води истрага за смртта на три новороденчиња на оделот за неонатологија во болница во Шамбериј кои биле инфицирани со заразени кеси за инфузија, што предизвика револт кај граѓаните.
Три бебиња, од кои две биле предвремено родени, починале на 6-ти, 7-ми и 12-ти декември од септичен шок, а на четвртото бебе навреме му биле откриени симптомите и тоа е спасено, пишуваат француските медиуми.
Директорот на болницата Gi-Pjer Marten изјавил дека оделението било затворено цела недела заради дезинфекција и дека се покажало дека немало никаква инфекција внатре во болницата.
Тој нагласил дека е потврдено дека бебињата се заразени со кесите за инфузија и дека анализите покажале дека се работи за опасна бактерија, без да прецизира за кој тип на бактерија се работи.
Родителите ја тужат болницата заради убиство од небрежност. Анализата на заразените кеси е сеуште во тек во Институтот Пастер, а резултатите се очекуваат за неколку дена. Засега не е познато од каде и на кој начин кесите биле заразени со опасната бактерија.