Одлуките на претседателот Иванов за целосно поништување на аболицијата на 56 лица се примени во Специјалното обвинителство, соопштуваат оттаму денеска. Од СЈО велат дека истражните дејствија се преземаат во зависност од тоа во која фаза е предметот.
Тие засега бараат притвор за две лица, од кои едно осомничено во предметите за незаконско уништување на опрема за прислушување наречен „Тврдина“, и против едно лице за предметот „Транспортер“, односно незаконското плаќање на превозници во Битола во десеткратно повисоки суми. За сите останати осоничени СЈО засега бара да бидат изречени мерки на претплазливост.
„Во врска со предметот во јавноста познат како „Титаник“ Ве известуваме дека истражната постапка продолжува против сите осомничени лица.
Во врска со предметот во јавноста познат како „Тортура“ Ве известуваме дека поднесени се предлози за определување мерка за претпазливост против 6 (шест) лицапоради постоење наосновано сомнение за сторено кривично дело – Мачење и друго сурово, нечовечко или понижувачко постапување и казнување од чл. 142 ст 1 вв чл. 22 од Кривичниот законик.
Во врска со предметот во јавноста познат како „Тврдина“ Ве известуваме дека е поднесен предлог за определување мерка притвор против 1 (едно) лице како и предлог за определување намерки за претпазливост против 4 (четири) лица, поради постоење на основано сомнение за сторено кривично дело од чл. 353 и 361 од Кривичниот законик.
Во врска со предметот во јавноста познат како „Транспортер“ Ве известуваме дека е донесена наредба за спроведување на истражна постапка против 1 (едно) лице поради постоење на основано сомнение за сторено кривично дело од чл. 353 ст 5 вв ст. 1, а вв. ст. 22 и 45 од Кривичниот законик, а поднесен е и предлог за определување на мерка притвор против истото лице. По однос на привремените мерки за обезбедување на имотноправно барање, Ве известуваме дека до Основен суд Скопје 1 Скопје е поднесен предлог кој беше вратен на доуредување, но ниту од Државното правобранителство ниту од Министерството за образование и наука се уште не се доставени предлози за остварување на имотно правно барање, иако тоа од наша страна беше побарано.
Во врска со предметот во јавноста познат како „ТНТ“ донесена е наредба за спроведување на истражна постапка против 3 (три) лица поради постоење на основано сомнение за сторени кривични дела од чл. 353 од Кривичниот законик, а поднесени се и предлози за определување мерка за претпазливост против истите 3 (три) лица.“ се вели во соопштението од СЈО.
СЈО до Апелациониот суд Скопје доставило и писмен предлог да се укине Решението на Основниот суд Скопје 1 Скопје и кривичната постапка по предметот во јавноста познат како „Пуч“ да продолжи.
Во делот на видовите на мерки кои се предложени од страна на ова Јавно обвинителство, oд СЈО велат дека до Основниот суд Скопје се поднесени соодветни предлози за определување на мерки, кои за секој конкретен случај се различни.