Италија го повика австрискиот амбасадор во Рим откако Владата во Австрија порача дека ќе постави воени сили на границите за да запре било каков мигрантски бран. Четири оклопни возила веќе се испратени во регионот околу Тирол, а околу 750 војници се подготвени во секој момент да бидат повикани доколку има потреба.
Според министерот за одбрана на Асвстрија, Ханс Питер Доскозил, војската ќе биде неопходна ако на премините помеѓу Италија и Австрија кај Алпите, не биде запрен бранот.
Со мигрантскиот бран во 2015 година Европа беше преплавена од бегалци кои ја користеа рутата преку Балканот за да стигнат најчесто до Германија.
Во Австрија пак, најмногу бегалците влегуваа преку Унгарија, а најчесто влегуваа луѓе од Сирија и Ирак.
Граничниот премин Бренер помеѓу Италија и Австрија е следната точка во фокусот каде се очекува бројот на бегалци да биде најголем.
Во првата половина од оваа година, околу 85.000 бегалци се пристигнати во Италија, што според УНХЦР е 20 отсто повеќе од првата половина минатата година.
Проценката е дека над 100.000 бегалци влегле во 2017 во Европа преку Медитеранот, а над 2.200 исчезнале или починале на својот пат.