Италијанскиот претседател Џорџо Наполитано најави дека нема да остане на својата функција до крајот на седумгодишен мандат, туку дека ќе се повлече „веднаш штом ќе ја заврши работата“.
-На функцијата ќе останам само толку колку што е потребно и ниту еден ден повеќе, изјави 88-годишниот Наполитано, објаснувајќи дека тоа „нема да се случи во подолг период“.
Изјавата на Наполитано доаѓа само осум месеци по надминувањето на длабоката политичка и парламентарна криза во која се најде Италија, по последните парламентарни избори. Тој помогна за надминувањето на кризата, по што прифати да остане претседател во втор мандат, што беше случај без преседан во италијанската политичка историја.
Во Рим никој не веруваше дека Наполитано на оваа возраст ќе остане претседател на државата уште седум години, но ова е првпат тој самиот да соопшти дека ќе се повлече од функција, побрзо отколку што тоа се очекуваше. Според Наполитано, тој ќе замине тогаш кога ќе оцени дека тоа ќе биде во најдобар интерес за државата.
Претседателот во Италија го избира Парламентот и тој има само протоколарна улога, но Наполитано со своето долго политичко искуство двапати досега успеа да помогне за разрешување на две кризни ситуации.
Првата, во 2011 година -по изнудената оставка на Силвио Берлускони во екот на економската и финансиската криза во Италија, претседателот наместо нови избори, успеа да обезбеди формирање на техничка Влада, предводена од Марио Монти.
Во вториот случај, Наполитано помогна да се надмине блокадата во Парламентот, откако на изборите во пролета 2013 година, ниту блокот на левицата, а ниту на десницата, не успеаја да одбезбедат доволно пратенички места за формирање стабилна Влада.
Наполитано како компромисно решение мандатот за состав на владата на големата коалиција му го додели на Енрико Лета и обезбеди продолжување на реформите што ги започна владата на Монти.
Неопходните реформи, а пред се донесувањето на нов закон за избори, е она на што инсистира италијанскиот претседател пред повлекувањето. Опозицијата бара нови избори пролетва и го обвинува Наполитано дека дејствува „над своите овластувања“, но тој инсистира изборите да се одржат по донесувањето на новиот изборен закон.