Италијанскиот премиер Џузепе Конте се откажа од својот мандат за формирање влада откако претседателот на државата стави вето на изборот на министерот за економија.
Претседателот Серџо Матарела рече дека се согласил со сите предлози, но не можел да го прифати Паоло Савона, познат како евроскептик.
Потегот на Матарела ги налути популистичките партии кои се обидуваа да формираат коалиција. Луиџи Ди Мајо, лидерот на 5-ѕвезди, побара импичмент за претседателот.
Италија е без влада од изборите на 4. март.
Двете популистички партии, 5-ѕвезди, кои освоија 32 отсто од гласовите, и екстремно десничарската партија Лига, која освои 18 отсто, се согласија претходно овој месец по неколкудневните разговори да формираат коалиција.
Конте, кој е политички почетник, беше предложен од двете партии за премиер, за да се надмине политички ќор-сокак што трае 11 недели.
Тој денеска се сретна со Матарела за да му ги даде предлозите за неговиот кабинет, но претседателот стави вето за Савона, повикувајќи се на неговото жестоко противење на Европската унија.
Според италијанскиот закон, претседателот има право да го одбие назначувањето на член на кабинетот.
Ди Мајо побара импичмент според членот 90 од Уставот, кој му дозволува на Парламентот да побара од претседателот да се повлече и тоа со просто мнозинство.
-Од вечерва, навистина е тешко да верувате во институциите и законите на државата, рече Ди Мајо.
Говорејќи по состанокот, Конте рече: “Како што веќе слушнате, го вратив мандатот за формирање влада што ми беше понудена од страна на претседателот Матарела”.
Матарела изјави дека “се согласил и ги прифатил сите предлози, освен оној за министер за економија”.
Тој рече дека пред да одлучи дали да свика нови избори, ќе разговара со Карло Котарели, поранешен директор на одделот за фискални прашања на Меѓународниот монетарен фонд (ММФ), во понеделник.
Котарели (64) работеше во ММФ од 2008 до 2013 година, и доби прекар “Г-дин ножици” поради планот за намалување на јавните трошоци во Италија.