Според најновите податоци на Istat, стапката на невработеност во Италија неочекувано пораснала во ноември, достигнувајќи рекордни 12,7 отсто, при што меѓу младите скокнала на рекордни 41,6 отсто.
Ова претставува најголема стапка на невработеност во Италија од 1977 година. Бројот на невработените на месечно ниво е зголемен за 55 илјади, а во споредба со ноември 2012 година за 448 илјади.
Во претходниот месец сезонски прилагодената стапка на невработеност изнесуваше 12,5 отсто, објави во средата Istat.
Најновите податоци од пазарот на труд не ги очитуваат колебливите знаци на економско закрепнување и ги истакнуваат тешките задачи со кои се соочува кревката коалиција на владата на премиерот Енрико Лета, насочена кон креирање на нови работни места и поттикнување на растот.
Повеќето аналитичари сепак сметаат дека третата по големина економија на еврозоната оди полека во насока на кревко закрепнување, но напоменуваат дека судирите помеѓу коалиционите партнери во владата на Лета ги отежнуваат нејзините настојувања да ја реформира економијата и да поттикне раст.