Лина Ѓорческа |(25) слави нова турнирска победа во кариерата. Најдобрата македонска тенисерка ја оправда фаворитската улога на ИТФ турнирот во Анталија што се играше за награден фонд од 15.000 долари. Таа во финалето беше подобра од финската колешка Уна Орпана со 6:4, 6:7, 6:1.
Мечот траеше речиси два и пол часа, но Лина можеше и порано да го реши финалето доколку ја искористеше меч топката што ја имаше во вториот сет при водство со 5:4 во гемови. Финката, сепак, успеа да остане во финалето и низ тај брејк се избори за трет сет во македонската тенисерка беше доминантна, набрзина поведе со 5:0 и ги реши дилемите.
За Ѓорческа ова е втора титула во поединечна конкуренција во 2019 година. И претходната ја освои во Анталија по триумфот над Русинката Ирина Хромачева со 6:3, 3:6, 6:1. Македонската тенисерка има и пораз во финалните мечеви оваа година, исто така, во Анталија во март кога загуби од Шони Мендез со 4:6, 0:6.
Кон нив, Ѓорческа има и пет титули во игра на двојки во оваа сезона. Со Русинката Анастасија Комардина триумфираа во Есен (Германија), Минск (Белорусија) и Гечо (Шпанија), со Романката Кристина Дину го понесоа трофејот од Хехинген (Германија), а со Маријана Дражиќ од Хрватска победија во Анталија.