Самиот факт што Грција дозволила да се формира импровизираниот бегалски камп кај Идомени ги охрабрило мигрантите и бегалците да користат илегални начини за преминување на границата, што ја става во директна опасност македонската национална безбедност, вели во интервју за грчкиот весник То Вима, претседателот Иванов.
Тој вели дека и по затворањето на „балканската рута“ и по трагедијата со масовниот обид за илегален премин на бегалците преку Сува река секоја вечер се регистрираат над 100 обиди за илегален премин на мигранти и бегалци.
„По се изгледа дека одредени политичари во Грција не ја сфаќаат сериозноста на безбедносните ризици што со себе ги носи оваа криза. Веќе постојат индиции дека дел од уапсените и осомничените за терористичките напади ја користеле токму „балканската рута“, изјави Иванов.
Претседателот Иванов потенцира дека македонските власти инсистирале на интензивирана соработка на сите нивоа со грчките власти, меѓутоа соработката се уште е на незадоволително ниво.
„На мое инсистирање до премиерот Ципрас и по еден сизифовски обид успеавме да воспоставивме билатерална полициска соработка. Меѓутоа, поради неодговорно однесување на грчките власти, меѓусебната комуникација останува на незадоволително ниво“, вели Иванов.
Тој нагласува дека до сега ниту еден грчки претседател не ја има прифатено неговата понуда за заедничка средба. Во однос на спорот со името Иванов неговите три средби со премиерот Алексис Ципрас ги оценува како охрабрувачки, но смета дека со една средба не може да се реши деценискиот спор.