Претседателот Ѓорѓе Иванов во заедничкото интервју со повеќе телевизии рече дека иако е свесен дека одлуката за аболиција на повеќе политичари не е на линија со владеењето на правото, тој морал тоа да го направи за да обезбеди чисти избори. Овој одговор дојде по прашањето на 24 вести зошто ако е толку загрижен за угледот на земјата во однос на чистите избори не го помилувал Љубе Бошковски којшто во секој извештај на Стејт Департментот се споменува како политички затвореник.
За владеењето на правото е малку цинично некој да ни кажува кога некој не спроведува одлука на судот од Хаг во однос на името. Точно е, се доведува во прашањето владеењето на правото, но мора да има чисти избори. Специјалното обвинилтество е злоупотребено бидејќи не може никој да ги затвори тие случаи пред изборите, па тие ќе се користат како памфлети на партиите да се напаѓаат едни со други за време на изборите.
Што се однесува до забелешките на СЈО како тој воопшто добил информации за предистражни постапки кои не јавни и не се ниту процесуирани за некој да биде помилуван Иванов кусо рече:
-Претседателот на државата си има начин да дојде до сите информации. Критиките од меѓународната заедница по однос на ова се затоа што тие не ги знаат сите детаљи за тоа што се случува, рече тој и ги искара амбасадорите дека премногу зборувале јавно нешта кои се надвор од нивниот мандат.
Тој рече дека на пример и аферата „Надеж“ би можела да се злоупотреби, па оттука помилувањето било неопходно.
Поената е дека пред изборите мора да создадеме состојба без притисоци и уцени, оценката да биде чиста. Тоа е тој виши интерес од кој поаѓам и преземам чекор со кој ни партиите не се согласуваат. Овој момент настојувам да бидам над нив. Тие се незадоволни, но поаѓав од државниот интерес, од оние мали деца кои одат по улици и се плашат некој да не им наштети и да не им направи нешто.