СЈО не било консултирано, ниту дало податоци за лица за кои се водат истражни и предистражни постапки за кои претседателот Ѓорге Иванов донесе одлука за аболирање.
– За неговата одлука дознавме од неговата прес- конференција, рече обвинителката Ленче Ристовска.
Таа истакна дека се работи за многубројни одлуки и потребна е анализиа со цел да утврдат колкав обем информации со кои Претседателот располага биле јавно објавени, а колку се доверливи.
– Досега сме ја информирале јавноста дека предистражната постапка е тајна и таа налага доверливост. Ние не можеме да ја коментираме листата на лица кои Претседателот ги аболирал, туку само оние кои јавно сме ги објавиле дека се води постапка, но не и за оние кои се во предистражна. Анализата е во тек и кога ќе собереме доволно докази за тоа од каде доаѓаат и се објавени вакви доверливи информации и ако утврдиме, ќе презмеме постапка за лицата да сносат соодветна одговорност. Уште ги разгледуваме одлуките на Претседателот од апсект дали имаат солидна основа за законски спроведена постапка, рече Ристовска.
Во име на јавните обвинители од СЈО кои се најдоа на листата на Иванов на аболирани, Ристовска рече дека тие не ја прифаќаат.
– Во името на сите нив, ве известуваме дека претставува грубо кршење на индивидуалните права како човекови права на јавните обвинители, кои народски речено се ставени во ист кош со лица за кои имаме докази со сомневања за сторени кривични дела. Аболициите не ги прифаќаат, бидејќи со нив директно се влијае на нивната чест и углед, рече Ристовска.
СЈО рече таа, продолжува со постапување по она што е во наша надлежност и истражување токму на овие кривични дела.
– Ќе ја почитуваме тајноста на предистражната постапка, иако имаме разбирање за интересот за кои лица и кои постапки се истражуваат. Цел е зачувување на интегритетот на постапките. Апелираме до сите граѓани кои кои поседуваат материјални докази за кривични дела од наша надлежност и други случаи, да ги достават до нас, а доколку се во наша надлежност ќе ги презмеме, ако не ќе ги проследиме до јавното обвинителство, истакна Ристовска.
Обвинителката Ристовска рече дека имаат и законска обврска да продолжат со работа по кривичните декла кои се во процедура и кои не се поврзани со аболицијата. Таа потенцира дека аболицијата воедно не ја запира постапката доколку се утврди дека е набавена имотна користа со незаконски начин. Односно, доколку кај овие лица се утврди стекнување на таква имотна корист на незаконски начин, тие ќе мора да ја вратат во Буџетот, односно на граѓаните на РМ.