Претседателот Ѓорге Иванов за празникот Илинден помилува 43 затвореници на кои им се скратува казната за три до осум месеци. На списокот нема ниту една жена осуденичка, но има затвореник кој одлежува казна за поседување на оружје. На истиот осуденик, според Телма казната му била скратена за шест месеци и минатата година за истиот празник.
Одлуката е објавена во завчерашниот број на „Службен весник“.
„Одлуката, како што е наведено, е донесена врз основа на членот 84, став 1, алинеја 9 од Уставот на Република Македонија и во согласност со членот 1 од Законот за помилување“, се вели во образложението.
Во објавениот список на помилувани на вкупно 29 затвореници делумно им се скратува казната за три месеци, за четири месеци им се намалува казната на петмина осуденици, за половина година на седдумина затвореници. Само двајца од осудениците ќе добијат делумно скратување на казната за седум и осум месеци.
Претседателот Иванов два пати годишно потпишува помилувања и тоа за националниот празник Илинден и Нова Година. Неговата последна одлука за помилување пред Нова Година предизвика големи реакции во јавноста поради рекордниот број на осуденици, вкупно 174, но и поради изборот бидејќи на листата се најдоа лица кои се осудени за тешки кривични дела за човештвото.
Во април годинава Иванов донесе одлука за аболиција на 56 политичари за кои има отворено предмети СЈО, спомнувани во прислушуваните разговори. По притисоците во јавноста и протестите, одлуката беше повлечена.