Претседателот на Република Македонија, Ѓорге Иванов, денеска и утре престојува во работна посета на Баку, Азербејџан, по повод учеството на 5. Глобален Баку форум, во организација на меѓународниот центар „Низами Ганџави“, соопштува Кабинетот на претседателот.
Тој ќе се обрати на претседателската сесија на форумот на тема „Иднината на меѓународните односи: моќ и интереси“.
За време на работната посета, предвидено е Иванов да оствари билатерална средба со претседателот Азербејџан, Илхам Алијев, како и повеќе билатерални средби со учесниците на форумот.
На глобалниот форум ќе учествуваат над 100 актуелни и поранешни претседатели, премиери и министри, дипломати, голем број истакнати личности од општествениот и политичкиот живот, универзитетски професори, како и претставници на Програмата за млади лидери на Глобалниот форум.
Меѓу останатите теми на дискусија на овогодинешнот форум се: иднината на Европа, улогата на Кина во меѓународните односи, односите меѓу Русија и Западот, предизвиците во справување со модерниот тероризам, дали екстремизмот и популизмот се најголема закана за безбедноста, иднината на трансатлантските односи, Алијанса меѓу западот и муслиманските држави.
Неговото отсуство е среде најголемата политичка и институционална криза во историјата на земјата- мандатот за состав на нова влада не го дава, а ситуацијата во државата од ден на ден тоне во се поголема неизвесност. НОВАТВ разговараше со неколку аналитичари, експерти за безбедност и поранешни функционери за тоа колку е оправдан овој потег на Иванов.