Новата претседателка на Антикорупциската комисија Билјана Ивановска очекува новиот состав на комисијата професионално, законито и транспарентно да работи и да застане во одбрана на јавниот интерес.
„Корупцијата ја урива стабилноста на институциите и моралните корени на општеството. Присутна е се повеќе, секојдневно, а граѓаните во отсуство на систем на вредности и интегритет се повеќе ја толерираат и прифаќаат како начин за остварување на своите цели.
„Чувствував лична, професионална, граѓанска должност да се пријавам на овој прв отворен конкурс за членови на Државната комисија и сметам дека оваа комисија ќе застане на браникот на јавниот интерес“, рече Ивановска.
Ивановска додаде дека ќе создаде моќна антикорупциска сила, а „најголеми антикорупционери се слободните граѓани“.
Ивановска ќе претседава со новиот состав на антикорупциската комисија кој за првпат беше избран во транспаретна постапка. За членови се избрани Владимир Георгиев, Софка Пејовска Дојчиновска, Катица Николовска, Нури Бајрами, Билјана Ивановска, Горан Трпеновски, Шемши Салаи.
Новите антикорупционери ќе можат да го следат и финанисирањето на политичките партии, да имаат увид во банкарски сметки, да проверуваат судири на интереси при вработувања или добивање на грантови. Тие ќе ја следат и изборната кампања и евентуалната злоупотреба на буџетски пари за партиски цели пред претседателските избори.