Колективното договорање останува на сила за вработените во јавниот сектор, изјави денеска министерот за информатичко општество и администрација Иво Ивановски.
Со цел да им се појасни на вработените кои ќе бидат засегнати од примената на овие закони, Ивановски рече дека ќе се направи техничка измена во законите, односно ќе остане само зборот „и“ во делот каде се споменува колективниот договор.
– Во законот стои дека дел од обврските на вработените во јавната администрација се регулираат со договорот или со колективниот договор. Бидејќи станува збор за иста намера дека колективниот договор останува на сила, како и досега, за да им појасниме на вработените, зборчето „или“ се менува и станува само зборот „и“, изјави Ивановски по средбата со претставници од Конфедерацијата на слободни синдикати (КСС).
Во однос на реакцијата од Синдикатот на УПОЗ кој бара повлекување на законите, министерот Ивановски истакна дека овој синдикат активно бил вклучен во изготвувањето на текстот на законите.
Претседателите на синдикатите од јавниот сектор – здружени во ССМ, Тихомир Климовски, претседател на Македонски полициски синдикат, Љубиша Каранфиловски, претседател на Самостојниот синдикат за здравство, фармација и социјална заштита на РМ, Ристо Ајтов, претседател на Синдикатот на одбраната и безбедноста, Зоран Георгиевски, претседател на Синдикатот на работниците од угостителството, туризмот, комунално-станбеното стопанство, занаетчиството и заштитните друштва на РМ, предводени од претседателот на
ССМ д-р Живко Митревски деенска ги продолжија разговорите во Министерството за информатичко општество по однос на Предлог-законот за вработените во јавниот сектор и Предлог-законот за административни службеници со министерот за информатичко општество и администрација м-р Иво Ивановски и заменик-министерот Марта Арсовска- Томовска.
На денешниот состанок синдикатите ги образлагаа дополнителните предлог-забелешки и мислења по однос на законите, по однос на повеќе прашања, а особено околу прашањата поврзани со постапките околу оценувањето, постапката околу казнувањето, системот на кариера и други прашања за кои претходно беше договорено да бидат доставени и конкретни забелешки.
Утре и во понеделник продолжуваат разговорите.