Официјално изборната кампања не е почната но политичките партии, посебно истакнати партиски функционери веќе форсираат предизборен наратив во кои селектирањето на фактите им е една од главните алатки себе да се престават како поштени ,хумани, солидарни, а во исто време, политичките противници да ги прикажат како несовесни, не солидарни и бесчувствителни за општата актуелна социјална состојба во државата.
Така, со покачувањето на платите на функционерите од 78%, партиските политиканти главно од актуелната опозиција се обидоа да го префрлат врз власта премолчувајќи притоа дека и функционерите на опозицијата, поконкретно многуте актуелни градоначалници на ВМРО-ДПМНЕ, исто така се офајдија со 78%. И не само тоа, туку полулистички ветија дека сумата адекватна на покачувањето ќе ја донираат во добротворни цели. Рекоа и пререкоа. Ниту соопштија дека донирале ниту донираа.
Но, нејсе. Кога е кај платите дури и „забораваат“ дека Македонија лани оствари највисоки покачувања на платите како во државниот, така и во приватниот сектор. Регионалната статистика вели дека Македонија е рекордер по зголемувањето на примањата на вработените. Така за 2023 година додека во БиХ платите пораснале за 9 %, Словенија за 9.6.% во Србија за 12.9%, во Хрватска за 13.9%, во Македонија за дури 16.4. Тоа се премолчува како што се премолчува и фактот дека токму високите функционери, конкретно на ВМРО-ДПМНЕ, факултетските професори, претседателот на ВБМРО-ДПМНЕ Христијан Мицкоски и претседателот на Советот на град Скопје Трајко Славески, на пример, кои се меѓу редовните најгласни во критиките за платите премолчуваат дека нивните месечни плати и тоа без другите додатоци, достигнаа дури 88.000 денари или се зголемени за цели 22% што е и над македонскиот годишен просек на покачување на платите. Згора, тоа се и ликовите кои редовно ги критикуваат политиките на владата за раст на платите, па дури и политиката на раст на минималната плата.
Инаку, со најновите покачувања на универзитетските плати, вкупно три илјади професори, асистенти, административни и технички лица ќе добиваат зголемен износ на личниот приход по основ на плата за околу 22 отсто, а дополнително зголемување за одреден процент ќе има и од март, кога е предвидено зголемување на минималната плата во државата. Станува збор за обврска согласно колективниот поединечен договор потпишан помеѓу Сојузот на синдикати на вработените на УКИМ и Собранието на Република Северна Македонија како основач на високообразовната установа, а чија цел е унапредување на правата, можностите и материјалната состојба на вработените на универзитетот“, информираат МОН.
Оттука, податоците за континуираниот раст на платите ги опфаќаат и партиските пропагатори, во случајов Мицкоски и Славески но кога станува збор за сопствениот џеб, овие партиски експоненти, сепак се решиле за селективен јавен пристап – нешто ќе кажат, нешто ќе премолчат. Секако второво што не им се вклопува предизборниот кампањски амбиент.
Р.Н.