Заменик-директорот на Канцеларијата за Косовo и Метохија, Крстимир Пантиќ денеска поднесе оставка, јавува „Танјуг“.
„Несакајќи со своето делување да и нанесам штета на Владата на Србија и граѓаните, поднесувам неотповиклива оставка од местото заменик-директор на Канцеларијата за Косово и Метохија“, наведе тој во својата изјава, додавајќи дека во понеделник за својата одлука ќе ги информира и премиерот Ивица Дачиќ, како и Александар Вучиќ.
Како што пишуваат српските медиуми, Пантиќ е незадоволен од притисоците од Приштина и Брисел.
Според него, изборите на Косово и Метохија иако се опишуваат како статусно неутрални, биле фарса од страна на меѓународните организации, додавајќи дека откако е предаден изборниот материјал, на него се ставале лепенки со грбот на Косово и натпис „Република Косово“, и дека на тој начин прекршени се основните принципи на меѓународните мисии.
„Со тој чин, тие Косово директно го признаа како независна држава иако не е“, вели тој.
Според неговите зборови, од претставниците на ЕУ пристигнуваат „непристојни понуди“ кои се однесуваат на формирањето на Совет на општината на северот од Косово и Метохија, а денеска „понуден е предлог по принципот земи или остави, кој претставува навреда за здравиот разум и достоинството“.