Извештајот за напредокот на Република Северна Македонија, подготвен од известувачот Томас Вајц, беше изгласан денес, од страна на Комитетот за надворешни работи (АФЕТ) на Европскиот парламент.
Состанокот започна во 9 часот, а извештајот беше првата точка на дневниот ред.
Со 40 гласа за , 10 против и 10 воздржани беше усвоен извештајот за Македонија за 2023 и 2024 година.
Предлогот за додавање на зборот „модерен“ пред „македонски идентитет и јазик“ не доби мнозинство гласови. Сите амандмани предложени од бугарските европратеници беа отфрлени.
Извештајот сега треба да биде одобрен на пленарно заседание на Европскиот парламент, а следното пленарно заседание на ЕП е закажано за од 7 до 10 јули во Стразбур.
Вајц изрази задоволство, бидејќи извештајот е изгласан со широко политичко мнозинство.
„Денеска го усвоивме првиот извештај за земјата на Северна Македонија од 2022 година во Комитетот за надворешни работи. Горд сум на целата напорна работа што беше вложена во наоѓањето компромиси за да можеме да го донесеме овој добро избалансиран извештај со широко политичко мнозинство. ЕУ мора да остане обединета со своите соседи во предизвикувачкиот геополитички пејзаж со кој се соочуваме. Северна Македонија припаѓа во ЕУ. По 20 години преговори, мора да го одржиме моменталниот добар моментум за понатамошно унапредување на процесот на проширување – вели Вајц.