Од печат излезе книгата „Да живее Долна дупка“ на легендата на македонската театарска и филмска уметност Коле Ангеловски – театарски и филмски актер, режисер и сценарист, комедиограф, писател и раскажувач. Книгата е своевидна збирка на четири комедии: „Да живее Долна дупка“, „Аферата ’Рекет’“, „Аферата ’Ладен шприцер’“ и „Птица со главата меѓу нозе“, кои Коле Ангеловски ги напиша во последните десетина години.
Од нив две веќе се поставени на сцените на македонските театри. „Да живее Долна дупка“, чиј режисер е самиот Коле Ангеловски, премиерно беше изведена на сцената на Театар Комедија на 29 јануари 2025 година и веќе доживеа десетина претстави. Оваа комедија, во која ликовите ги играат Горан Ников, Жаклина Стевковска, Роберт Ристов и Јаков Спасов, успева со леснотија и хумор, а сепак жестоко, низ сатирична визура да ги согледа и да ги претстави нашата посттранзициска стварност, општествените аномалии и отсуството на вредностите.
„Да живее Долна дупка“, според рецензентот на книгата Горан Смилевски, на извесен начин, е нашиот македонски „Ревизор“. „За ликовите кои живеат во Долна дупка недостижниот Брисел ја има позицијата која за ликовите од зафрлената руска провиниција ја има далечната престолнина, ликот на градоначалникот е современ и овдешен пандан на Антон Сквозник – Дмухановскиј, додека пак Роберт во рамките на драмското дејствие на ’Да живее Долна дупка’ ја има функцијата која во ’Ревизор’ ја има Хлестаков“.
„Птица со глава меѓу нозе“, исто така во режија на Коле Ангеловски, пак, премиерно беше изведена на сцената на Драмски театар – Скопје на 10 ноември 2021 година. Преку улогите на актерите Стефан Вујисиќ, Маја Вељковиќ Пановска, Благој Чоревски, Ѓокица Лукаревски, Марија Кондовска, Анастас Тановски, Калина Наумовска, Благица Димитровска и Симон Манасковски, „Птица со главата меѓу нозе“ говори за растргнатоста на индивидуата меѓу сегашноста и минатото, за пандемијата, економската криза и за социјалните превирања во нашава земја.
„Аферата ‘Ладен шприцер’“ од една комична перспектива ни ги претставува аномалиите на начините на кои се одвива локалната самоуправа, а провокативноста на „Аферата ‘Рекет’“, пак, произлегува од тоа што главните ликови се засновани на главните протагонисти од аферата позната на нашата јавност под истото име, но тоа е само почетна точка за Ангеловски, кој на извонредно комичен начин го развива драмското дејствие.
Во сите четири комедии обединети во оваа книга, преку необичните пресврти и извонредно водениот дијалог, Коле Ангеловски успешно им дава драмски облик на актуелностите на нашето време.
Приредувач и уредник на „Да живее Долна дупка“ е Свето Стаменов, политиколог, новинар и несомнено еден од најплодните македонски публицисти, автор, коавтор, приредувач и уредник на седумдесетина книги од најразлични жанрови, додека, пак, за дизајнот на книгата се погрижи младата македонска графичка дизајнерка Бојана Симевска. Книгата е збогатена и со триесетина колор фотографии од претставите „Да живее Долна дупка“ и „Птица со глава меѓу нозе“ во Театар Комедија и Драмски театар.
Излегувањето на книгата финансиски е помогнато од Министерството за култура и туризам во рамките на Годишните конкурси за финансирање проекти од национален интерес во 2026 година.
Инаку, Коле Ангеловски, покрај „Да живее Долна дупка“, автор е и на книгите „Како Орсон Велс ме бркаше по улиците на Мостар“ (2012) и „Педесет години во Драмски и клоцата во …“ (2019), чиј приредувач и уредник беше Свето Стаменов, како и на ЦД-ром со шеесет театарски текстови, кои за прв пат беа преведени на македонски јазик, а повеќето од нив беа реализирани како претстави на сите сцени во Македонија.