Како дел од програмата „Културата како стил на живеење“ на Центарот за култура и културолошки студии, вечерва во галеријата „Икона“ со почеток во 19.30 часот ќе биде отворена изложбата „ЕКОАРТ-ЕХО“ на академската сликарка Дафина Балабанова – Алексовска.
На изложбата, која ќе содржи рачно изработен уметнички накит од природни еко материјали, ќе говори Розе Трајчевска.
„Уметничките еко-алки, изработени пред 25 години, а токму заради проверка на експериментот достапни за јавноста дури сега, сами по себе сведочат: нема ништо нетрајно во природните материјали, тие се со иста структура и интензитет на бојата како и во времето на нивното настанување. А ние би додале: нивниот дизајн и сега, по четвртина век, ги прави посакуван моден детаљ за сите оние кои излегуваат од калапот на трендовската мода“, се вели во рецензијата на проф. д-р Лорета Георгиевска – Јаковлева.
Центарот за култура и културолошки студии од своето формирање е насочен кон активно делување на културата во развивањето на демократскиот потенцијал на општеството.