„Нераскажаните приказни на суперхероините“ е насловот на изложбата што ќе биде отворена вечерва во 20 часот во галеријата на Младинскиот културен центар.
Публиката ќе ги види најновите дела на македонските уметници: Дијана Томиќ Радевска, Марија Сотировска, Кристина Божурска, Ана Ивановска, Дијана Богдановска, Инес Ефремова, Мирослава Трујкановиќ, Зорица Зафироска, Јасминка Новковска и Александра Петрушевска
– Во темните ходници на уметничката историја недостигаат делата, како и имињата, макар и на хипотетичките, а камоли на реалните „сестри“ на Шекспир, Рубенс, Дирер, Гоја, Бројгел, Бош – кои треперат како сенки во флуидот нераскажаното, неискажаното, невидливото. Уметничките, освен со ретки исклучоци, остануваат надвор од визибилното поле на историјата на уметноста. Инвизибилни, или, во најдобар случај, инкогнито – избирајќи го родово многу поприфатливиот машки псевдоним – вели Елизабета Шелева во текстот од каталогот за изложбата.
Искуствата на ликовните авторки од Македонија, според Шелева, се на естетски посакуваното, а во практиката не толку лесно остварливо и достижно ниво, на високореспективна, притоа критичка родова авторефлексија,
– Оваа изложба, овие дела, овие авторки, овој текст се плод токму на оваа насушна, базична, онтолошки поставена, есенцијална, етички и естетички неприкосновена и никојпат конечно задоволена потреба, повик и обраќање до Другиот, вели Шелева.