Скулптури, графики и цртежи на познатиот француски уметник со унгарско потекло, Виктор Вазарели ќе бидат изложени утре во Галерија „Остен“.
Поводот за оваа изложба е Денот на Европа, а е во организација на Галеријата „Остен уметност на хартија“, Делегацијата на Европската Унија во Скопје, Амбасадата на Унгарија и Францускиот институт во Скопје.
На отворањето пред присутните ќе се обратат амбасадорот на Франција, Лоранс Оер, амбасадорот на Унгарија, Јозеф Бенч, и Аиво Орав, шеф на делегацијата на Европската Унија.
Виктор Вазарели е унгарски уметник, натурализиран Французин, кој денес се води како татко на оптичката уметност. За време на своето творештво Вазарели развива сопствен модел на апстрактна геометриска уметност, работена на најразлични материјали, со минимално присуство на форми и бои. Како графичар се прославува со своето прво позначајно дело „Зебра“ кое се состои од накривени црни и бели линии при што наговестува во која насока ќе продолжи да создава. „Зебра“ денес се смета за првото дело во жанрот Оп уметност.