Во Музејот на град Скопје, по повод 50 години од земјотресот во Скопје, вечерва ќе биде отворена изложбата „Недовршени модернизации: помеѓу утопијата и прагматизмот“ .
Изложбата е финале на двегодишниот истоимен проект, реализиран од Здружението на хрватските архитекти од Загреб; Орис куќа на архитектурата од Загреб, Музејот за архитектура и дизајн од Љубљана, Уметничката галерија од Марибор, Здружението на архитектите од Белград и Коалицијата за одржлив развој – КОР од Скопје. Проектот, реализиран во рамките на европската програма Култура 2007-2013, претставува иницијатива за долгорочна истражувачка платформа за архитектурата и урбаното планирање на просторите на поранешна Југославија, создавани во периодот од почетокот на заедничката социјалистичка држава до денес, гледано низ призмата на еден поширок социјален, политички и културен контекст.
Преку изложбата се претставени карактеристичните архитектонски и урбанистички практики од периодот на социјализмот во однос на општествениот контекст во кој тие настанале, но и нивниот сегашен изглед и карактер. Опфаќајќи ја целокупната работа на истражувачите од Хрватска, Македонија, Босна и Херцеговина, Србија и од Словенија, изложбата, освен со естетските и технолошките достигнувања на архитектонските и на урбанистичките проекти, се занимава и со општествената перспектива на процесите што влијаеле врз развојот, постоењето и распадот на Југославија. Релевантноста на избраните проекти се оценуваше врз основа на придонесот на тие достигнувања во обликување на јавната сфера. Една од целите на проектот беше и да го преиспита општото (и меѓународно прифатеното) верување за периодот на урбаната модернизација во поранешна Југославија и да ја промовира различноста на културните идентитети во регионот.
Кустоси на изложбата се Мароје Мрдуљаш и Владимир Кулиќ, а ко-кустоси на изложбата во Скопје: Дивна Пенчиќ, Јасна Стефановска.
Изложбата ќе биде отворена до 30 јуни.