Доколку бидат изгласани измените на Кривичниот законик кои се веќе во собраниска процедура, според информции на НОВА, од кривично гонење можат да бидат ослободени обвинетите во случаите Тендери и Трезор. Измените на Кривичниот законик можат да влијаат и врз жалбената постапка на веќе обвинетите во „Тенк“.
Во случајиот „Тендери“ е обвинета екс министерката за култура Елизабета Канческа Милевска, во „Трезор“ се обвинети Сашо Мијалков Горан Грујовски, Тони Јакимовски и Небојша Стајковиќ. Во „Тенк“ се веќе осудени Никола Груевски, Ѓоко Поповски и Гордана Јанкулоска.
Со измените на Кривичниот законик кои се ставени на дневен ред на денешната собраниска седница се предлагаат измени на членот 275-в кој се однесува за злоуптреба на постапката за јавен повик, доделување на договор за јавни набвки или јавно -приватно партнерство. Измените се во ставот 3 во кој се намалува затворската казна од 5 на 4 години. Тој гласи:
„Ако сторителот со извршување на делото од ставот 1 на овој член остварил за себе или за друг имотна корист од поголеми размери, ќе се казни со затвор од најмалку 5 години“.
Сега се менува на „4 години“.
Измени се предлагаат и во членот 353 за злоупoтреба на службената положба и овластување.
„Службено лице кое со пречекорување на службените овластувања ќе прибави за себе некаква корист, ќе се казни со затвор од 6 месеци до три години“. Сега зборот „некаква“ се менува со „имотна корист“.
Во Собранието заседава пратеничката група на СДСМ која одлучува дали измените на КЗ ќе се повлечат или не.
Министерката за правда Рената Дескоска рече дека од Владата не се доставени измени на КЗ. Измените што се во собраниска процедура се поднесени од пратеници од СДСМ и од ДУИ.
Пратеничката од независната пратеничкта група Нола Исмајлоска Старова рече дека измените нема да значат „губење“ на случаите на СЈО. Канческа Милевска пак, не сакаше да ги коментра измените и рече дека првпат слуша дека се предлага такво нешто.
СЈО не го интересираат и не е вклучен со меѓупартиските преговори за измена за членот 353 од Кривичниот законик, изјавија од СЈО за ТВ 24.
Измената на членот 353 Кривичниот законик беше споменато и во контекст на лидерските средби што се одржуваа летоска во контекст на референдумот за Договорот со Грција како услов за членството во НАТО и ЕУ. Тогаш неофицијално се споменуваше дека ВМРО ДПМНЕ предложило измени на овој член за намалување на казните за „злоупотреба на службената положба и овластување“. Од ВМРО ДПМНЕ демантираа дека бараат амнестија, а од власта тогаш порачаа дека избегнување кривична одговорност е неприфатливо.