Добрата вест е што до крај на февруари ќе направиме колективен имунитет и за 8ми март ќе може пак да играте чочеци, уверува д-р Беќаровски
И кај нас ќе се намали изолацијата на асимптоматските случаи од 10 најверојатно на седум дена, но предлог-одлуката од Комисијата за заразни болести ќе „падне“ по божикните празници, в понеделник, кога се очекува да се одржи состанок.
– За намалување на задолжителната изолацијата веќе дискутиравме на два состанока на Комисијата, а одлуката ќе ја донесеме следната недела. Лицата кои се асимптоматски е доволно седум дена да бидат во изолација, која сега изнесува 10 дена, додека за контактите на лицето со ковид-19 изолацијата се уште трае 14 дена, а и тој период ќе се намали – велат неофицијално за НОВА ТВ членови на Комисијата за заштита на населението од заразни болести.
Со оглед дека инкубацискиот период по контакт со заразен со омикрон трае само два-три дена и драстично го зголемува бројот на заразени со ковид-19, веќе до петок се прогнозираат и до 5.000 заболени во земјава на дневно ниво, постои опасност поради енормниот раст да се блокира целиот систем.
На ова предупредува и д-р Нико Беќаровски, токсиколог на Клиниката за токсикологија кој преку својот Фејсбук профил синоќа ги повика членовите на Комисијата за заразни болести уште денеска да ги сменат протоколите, бидејќи „в понеделник ќе нема кој да работи!“.
„Почитувани членови на Комисијата за заразни болести
Ако уште утре не ги смените протоколите за изолација на контактите со Ковид болни и не го намалите времето за изолација на позитивните, НА 10.01.22 ЌЕ НЕМА КОЈ ДА РАБОТИ ВО ДРЖАВАТА !!!!
Сите ќе бидеме во изолација.
Изолацијата на контактите при вака раширен Омикрон е неодржлива и без епидемиолошка оправданост.
Задолжителната изолација за позитивните треба да се намали на 7 дена.
#Почитувани граѓани ако денес имавме 1197 позитивни со регуларно направени тестови, сигурно има уште >5000 кои се самотестирани и >25.000 недијагностицирани.
Добрата вест е што до крај на февруари ќе направиме колективен имунитет и за 8ми март ќе може пак да играте чочеци.
P.S. за Flurona и Ihu некој друг дeн, премногу е за денес“, објави д-р Беќаровски.
(Љ.Б.)