Миле Јанакиески, поранешниот министер за транспорт и врски е осуден на три години затвор во судскиот предмет познат во јавноста како „ТНТ“, а кој се однесува на случајот со уривањето на објектот „Космос” на бизнисменот Фијат Цаноски поради злоупотреба на службената положба и овластувања.
Судечкиот совет на Кривичниот суд во Скопје предводен од судијата Огнен Ставрев на Никола Груевски, поранешен премиер му изрече казна од 9 години затвор , а поранешниот градоначалник на Општина Гази Баба, Тони Трајковски кој исто како и Груевски е обвинет за злоупотреба на службената положба и овластувања доби четиригодишна затворска казна. Инспекторката Елисавета Најдовска е осудена на четири години затвор.
Обвинтелството, претходно побара затворски казни за сите обвинети во случајот „ТНТ“. Обвинителот Бурим Рустеми во завршниот збор за овој предмет ја намали сумата на нанесената штета од 35 милиони евра на околу 20 милиони евра и рече дека поранешниот премиер Никола Груевски ја остварил својата желба да го урне „Космос“ на својот политички противник Фијат Цаноски и да му нанесе финансиска штета, како одмазда затоа што во 2011 година коалицирал со СДСМ. Ова, рече тој, го направил во координација со екс министерот Миле Јанакиески, и поранешниот градоначалник на општината Тони Трајковски.
Поради недостиг на докази, обвинителот на претходното рочиште се откажа од гонење за едно од делата за кои се товари Миле Јанакиески, а кое се однесува на злоупотреба на тенедерот за уривање.
Јанакиески, пак, во завршниот збор побара ослободителна пресуда и се повика на аболицијата на претседателот Иванов и на правното мислење од министерот за правда Тупанчевски, во кое посочува дека предметот е застарен.
С.М.