Пронајдени се телата на 17 од 22 лица кои биле во авионот што се урна во Непал. Потрагата по преостанатите луѓе продолжува, рече портпаролот на авиокомпанијата Сударшан Бартаула.
Бартаула рече дека спасувачите веруваат дека некои тела се закопани под остатоците на авионот. Спасувачите кои работат со голи раце не можеа да ги преместат металните остатоци, рече тој.
Авионот „Twin Otter“ изгуби контакт со аеродромската кула во неделата додека леташе на закажаниот лет од 20 минути во област на длабоки речни клисури и планински врвови. Во авионот се наоѓале четворица Индијци и двајца Германци, соопшти компанијата Тара Ер. Тројцата членови на екипажот и другите патници биле непалски државјани, се вели во соопштението.
Остатоците ги лоцирале селаните кои барале во областа Јарсагумба.
Се претпоставува дека авионот го пресекол врвот на помала планина, а потоа удрил во поголема планина. Локалните вести велат дека меѓу патниците имало две непалски семејства, едното со четири члена, а другото со седум.
Воздушните фотографии од местото на несреќата покажаа делови од авиони расфрлани на карпи и мов од страната на планинската клисура.
Армијата соопшти дека авионот се урнал во Саносвер во областа Мустанг во близина на планинскиот град Џомсом, каде што се движел по полетувањето од туристичкиот град Покара, 200 километризападно од Катманду. Дестинацијата на авионот е популарна кај странските планинари и кај индиските и непалските аџии кои го посетуваат локалниот храм.
Twin Otter е авион на канадскиот производител на авиони De Havilland и е ценет поради неговата издржливост и способност да полетува и слетува на кратки писти. Производството на авионите првично заврши во 1980-тите. Друга канадска компанија, Viking Air, го врати моделот во производство во 2010 година.