Американските воени напади врз три ирански нуклеарни постројки минатиот викенд не ги уништија клучните компоненти на нуклеарната програма на земјата и веројатно ја забавија за само неколку месеци, покажува раната проценка на американската разузнавачка заедница, објави Си-Ен-Ен.
Проценката ја направи Агенцијата за одбранбено разузнавање (ДИА) и се базира на анализа на штетите спроведена од Централната команда на САД (ЦЕНТКОМ) по нападот, изјави еден од изворите.
Анализата е сè уште во тек и би можела да се промени како што ќе пристигнуваат повеќе информации, но првичните наоди се спротивни на тврдењата на американскиот претседател Доналд Трамп, кој постојано повторуваше дека нападите „целосно и крајно ги уништиле“ иранските постројки за збогатување ураниум. Министерот за одбрана Пит Хегсет, исто така, изјави во неделата дека „нуклеарните амбиции на Иран се уништени“.
Сепак, два извори запознаени со извештајот тврдат дека залихите збогатен ураниум не биле уништени.
ДИА проценува дека САД успеале да ја забават иранската програма за можеби неколку месеци, во најдобар случај, рече изворот.
Белата куќа потврди дека извештајот постои, но тврди дека е неточен.
Оваа наводна проценка е целосно неточна и класифицирана како „строго доверлива“, но сепак беше доставена до Си-Ен-Ен од анонимен понизок службеник на разузнавачката заедница“, изјави портпаролката на Белата куќа, Каролина Ливит. „Објавувањето на оваа наводна проценка е јасен обид да се дискредитира претседателот Трамп и храбрите пилоти на борбени авиони кои ја извршија мисијата за уништување на нуклеарната програма на Иран до совршенство. Секој знае што се случува кога ќе фрлите четиринаесет бомби од 30.000 фунти врз нивните цели: тотално уништување.
Американската војска соопшти дека операцијата поминала според планот и дека била „целосен успех“.
Сепак, според изворите, сè уште е прерано САД да имаат целосна слика за последиците од нападот, а проценките на другите разузнавачки агенции исто така не се познати.