Меѓународната коалиција предводена од САД, која се бори против Исламската држава го нападна центарот на градот Кобани каде што за прв пат влегоа борците на ИСИС.
Воздушните напади биле извршени врз позиции кои биле под контрола на ИД, пренесува Ал Џезира.
Денешните напади доаѓаат еден ден откако борците на ИД се упатија кон Кобани и заземаа три области.
Според известувањата на „Ал Џезира“, и покрај сериозните навлегувања на ИСИС во градот, сеуште можат да се забележат курдски знамиња. Курдските сили засега спречиле целозно навлегување на џихадистите во градот, пренесува агенција АФП.
Според претставник на Курдите, нападите на САД помагаат но не се доволни.
– Ни треба помош од меѓународната заедница. Или ние ќе ги уништиме нив или тие нас, вели претставник на курдските сили за АФП.
Изминатите неколку дена градот Кобани стана главното жариште во борбата против ИСИС. Засега, околу 186.000 цивили пребегале во Турција.
Претставници на Турција велат нивната земја сега е во најтешка положба.
– Турција не сака автономен регион на Курдите на границата со Сирија, но не сака ни ИСИС да владеат на овој регион. А Турција не сака ни сирискиот претседател Башар Ал-Асад да наметне контрола, велат тие.