ЈАДРО, асоцијацијата во која членуваат независните културни институции и поединци, потпиша спогодба за соработка со Јани Макрадули, кандидат за градоначалник на Скопје и со кандидатот на Либералната партија Горан Николовски. Во Прилеп, ваква спогодба е потпишана со тројцата кандидати за градоначалници: Хари Локвенец од Коалицијата „Сојуз за иднината“, Зоран Петрески од Социјал демократска унија и со Марјан Ристески од ВМРО – ДПМНЕ.
Кандидатот за градоначалник на Битола Менде Диневски и кандидатката на Републиканската Алијанса Габриела Арсовска Милошевска, кои, според Искра Гешоска, претседателката на ЈАДРО, покажале политичка волја за понатамошен дијалог.
„Нагласувам дека ги контактиравме сите кандидати за градоначалници, но тие немаа слух за средба, разговор и евентуално потпишување спогодба за соработка“, вели Гешоска.
Со спогодбата за соработка се дефинираат начините за финансирање на независниот културен сектор во градот и во општините и формирање на посебна институција помеѓу градот и независниот културен сектор.
-Имајќи на ум дека ЈАДРО се залага за партиципативна улога во креирањето на културните политики на локално и централно ниво и за подобрување на условите за работа на независниот културен сектор, сметавме дека е нужно да се контактираат кандидатите за градоначалници кои претендираат за мандат на ниво на Градската управа, и со нив да се потпише спогодба за соработка во која тие ќе се обврзат да ги вклучат нашите барања доколку добијат мандат. Воедно ЈАДРО ја презема оваа активност и заради создавање поинаква перспектива и поинакво читање на културата – како важен социо-културен сегмент, а не само како нешто кое постои херметично, изолирано од останатите општествени и политички случувања и слоеви, вели Гешоска