Одбраната на Миле Јанакиески, поранешниот министер за транспорт и врски, обвинет во судскиот предмет познат во јавноста како „ТНТ“, а кој се однесува на случајот со објектот „Космос” на бизнисменот Фијат Цаноски очекува судечкиот совет на Кривичниот суд во Скопје утре да изрече ослободителна пресуда со оглед на тоа што не постои ниту еден акт што е потпишан од страна на поранешниот министер, а поврзан со уривањето на комплексот.
Јанакиески и во својот исказ неодамна пред судечкиот совет што го предводи судијата Огнен Ставрев посочи дека оштетениот Цаноски сам истакнал дека бара политичко решение на овој предмет, со што, според него, признал дека објектот е нелегален.
Јанакиески кој од сите обвинети во предметите што ги покрена поранешното Специјално јавно обвинителство има најмногу обвиненија, во своите завршни зборови на последното рочиште изрази надеж дека судот ќе донесе „одбивателна пресуда“.
– Ако добијам и шеста осудителна пресуда, дали нешто ќе се смени во општеството? Мојот одговор е дека ништо нема да се подобри, освен што Цаноски ќе заработи од буџетот на државата, давајќи поттик на други своето незаконско работење да го прикријат преку политички решенија користејќи ги правосудните органи, рече Јанакиески.
Бранителот на Груевски кој му е определен по службена должност во завршните зборови тврдеше дека неговиот клиент нема сторено никаква вина и дека за тоа нема докази затоа што Груевски немал потпишано каков било документ за да се урне објектот на Цаноски, а тоа според адвокатот, не можат да го потврдат ни „бомбите„ затоа што одбраната изрази сомнеж во нивната автентичност. И бранителот на Груевски побара ослободителна пресуда.
Одбраната на поранешниот градоначалник на Општина Гази Баба, Тони Трајковски исто така очекува тој да биде ослободен од обвинението. Во завршните зборови на последното судско рочиште Трајковски негираше дека кога било испратил смс порака до поранешниот премиер Никола Груевски, а тврдеше дека не остварил никаков контакт со него поврзан со изградбата на објектот на Цаноски, ниту пак дејствувал по нечија наредба.
Според одбраната на поранешниот градоначалник на Општина Гази Баба, судечкиот совет треба да обрне внимание на релевантните докази, бидејќи со ништо не се докажува вината на Трајковски и треба да биде ослободен од обвинение.
Јавниот обвинител Бурим Рустeми, пак, од судот побара обвинетите да ги прогласи за виновни и да им определи соодветни казни. Тој тврди дека во текот на судскиот процес со сигурност се докажало дека обвинетите ги сториле делата што им се ставаат на товар и дека обвинетиот Никола Груевски ја злоупотребил својата позиција и влијание како премиер да ја оствари својата желба да му го урне комплексот Космос на својот политички противник Фијат Цановски и да му нанесе финансиска штета.
Во случајот „ТНТ“, освен Јанакиески,Трајковски и Груевски, кому му се суди во отсуство, пресуда утре очекуваат и еден градежен инспектор и тројца вработени во општина Гази Баба.
С.М.