Судењето за ТНТ продолжи по двочасовната пуза која ја добија новите адвокати за да се запознаат со доказите против нивните клиенти обвинети за уривањето на комплексот „Космос“. По два часа увид во предметот ТНТ, Јовица Страшевски, новиот адвокат на поранешниот градоначалник на Гази Баба, Тони Трајковски и другите двајца адвокати назначени по службена должност, пак бараа дополнително време да го разгледаат предметот и побараа одложување на рочиштето или за неколку часа или за друг ден.
„Вие како судија две години го водите случајот и не сте успеале да го завршите, а барате од мене да го завршам увидот за два часа и да го испрашувам Миле Јанакиески и да го бранам. Станува збор за материјал од 20.000 страници“, рече Страшковски.
По бурните реакции од адвокатите кои се децидни дека ќе се направи процесна повреда во случајот судијата Огнен Ставрев му даде збор на адвокатот Еленко Миланов да го испраша неговиот клиент Миле Јанакиески.
Обвинетиот Јанакиески рече дека од 2006 до 2015 година бил министер за транспорт и врски.
„Дозволите за градба на објекти како куќи и станбени објекти каков што е и посочениот комплекс „Космос“ не ги издаваше Министерството за транспорт и врски, туку локалните самоуправи. За сите надлежности за овој објект надлежност имала општина Гази Баба“, рече Јанакиески.
Ексминистерот рече дека тие како бизнисмени биле такви што сакале постојано да кокетираат судии и обвинители и на почеток силно ја поддржувале политиката на ВМРО ДПМНЕ.
„Бев навреден кога ми кажаа дека јас сум сакал да го рушам „Космос“ поради бизнис интереси. По четири години, Миле е омилен лик на Финансиската полиција, на Основното Јавно Обвинителство, на Специјалното Јавно Обвинителство. Магарето замина, сега се удира по самарот“, додаде Јанакиески и потенцира дека Фијат Цаноски бил во интензивна комуникација со првообвинетиот Никола Груевски во период од април во 2010 година до август во 2011 година.
Јанакиески посака да го праша Цаноски за односите со Сашко Мијалков и со Муса Џафери и за тоа кој што му ветувал бидејќи, како што рече, тој не му ветил дозвола за градба спротивно на Законот.
„Едно ливче немам потпишано. Не може Миле да е кабает. Тој објект е дивоградба и сега го тврдам тоа“, рече ексминистерот за транспорт и врски.
За случајот „ТНТ“ кој се однесува за рушење на „Космос“ на Фиат Цаноски, меѓу обвинетите се поранешниот премиер Никола Груевски, поранешниот министер за транспорт и врски Миле Јанакиески, како и поранешниот градоначалник на општина Гази Баба, Тони Трајковски, потоа Елизабета Најдовска, Насер Алев, Марика Зафирова и Александра Димитриева.