Три и пол години затвор за поранешниот министер за транспорт и врски Миле Јанакиески пресуди судечкиот совет во случајот познат во јавноста како „Топлик“, а покренат поради злоупотреба на службената положба и овластувања при продажба на градежно земјиште за изградба на населбата „Сончев град“ во Сопиште.

Со сторените злоупотреби, според судот, обвинетите го оштетиле буџетот за милион евра од камати поради пропаднатиот договор за купопродажба на земјиштето за комплексот „Сончев град”.

Обвинети се уште пет лица од Министерството за транспорт и врски, кои биле членови на Комисијата за јавни наддавања. Томе Ѓурчилов доби тригодишна затворска казна, а Димитар Димовски, Марица Тасева, Димитар Гаќев и Веса Томчевска  условни казни.

Судијата објави дека штетата осудените солидарно треба да ја надоместат.

Предметот беше отворен од поранешното СЈО.

Јанакиески беше обвинет затоа што како раководно лице во Министерството за транспорт и врски, спротивно на Законот за јавни набавки составил Комисија за јавни наддавања на која ѝ наложил да избере понудувач за купување и располагање со државно земјиште за изградба на елитниот комплекс „Сончев град“ во Сопиште, иако фирмата не ги исполнувала условите за тоа.

Случајот го води судијата Осман Шабани, а застапник на обвинението е обвинителот Бурим Рустеми.

С.М.