Македонскиот уметник Јане Чаловски е дел од второто издание од Биеналето за современа уметност „D-0 ARK Underground во Сараево – Коњич“ кое се отвора денеска во Титовата атомска воена централа во Коњич.
Куратори на годинешното издание на Биеналето се Башак Шенова од Турција и Бранко Францеши од Хрватска кои вклучија 35 уметници од 19 земји. Од Македонија дел од Биеналето е само Чаловски со делото „Веројатен аранжман“ (Potential Arrangement)
Во рамките на второто издание на Биеналето e организирана и јавна програма која се одвива оваа седмица, а на која своја презентација и разговор со публиката има и Чаловски. Овој дел се одвива во периодот од 23. до 25 април, во Бошњачкиот институт Фондација „Адил Зулфикарпашиќ“.
Вториот дел од придружната програма на Биеналето е тркалезната маса на која ќе се разговара за улогата на Биеналето како институционален модел и одговорноста на кураторот, за образовната функција на Биеналето и начинот на работење во уметноста. Тркалезната маса има значајна и практична улога во запознавањето на студентите со некои од водечките историчари на уметност, куратори на други биеналиња, теоретичари и уметници.
Уметничката практика на Чаловски е насочена кон експериментални идеи често ситуирани во конкретна специфичност на нова културна и политичка географија адресирајќи ја нецеловитоста и недостигот од наративи и историја. Објектите, цртежите, видеата и инсталациите на Чаловски често произлегуваат од неговото континуирано искуство во различни интернационални контексти и биле изложувани интернационално на индивидуални и групни изложби како Tate Britain (Лондон), Музејот на современа уметност (Скопје), The European Kunsthalle (Келн), Contemporary Art Center (Вилнус), Kronika (Битом), Philadelphia Museum of Art, The Drawing Center (Њујорк) и други. Тој исто така изложувал и на Манифеста 3 (Љубљана, 2000) и Манифеста 7 (Болзано, 2008).
Титовото атомско засолниште наречено АРК, е изградено во периодот од 1953 до 1979 година, од страна на југословенската армија, како воен бункер со функција на главен центар за воени операции или воени команди и како засолниште за претседателот Јосип Броз Тито, неговото семејство и неговите најблиски соработници, во случај на војна. Засолништето окупира простор од 6500 м2, се состои од 12 поврзани блокови и може да згрижи 350 луѓе. Наликува на комплициран лавиринт, со резиденцијални простори, соби за конференции, канцеларии, соби за стратешко планирање и други функционални делови. Изградбата и постоењето на бункерот биле држани во тајност до 1990-тите години кога АРК било конечно откриено.