Специјалната јавна обвинителка Катица Јанева која денеска беше приведена, попладнево е донесена во Кривичниот суд каде треба да даде исказ пред судија на претходна постапка. Автомобилот со Јанева беше внесен во гаражите на судот.
Обвинителството бара 30 дневен притвор за Јанева откако таа е осомничена за злоупотреба на службената положба и овласување во случајот „Рекет“.
Јанева нема имунитет и доколку судот го прифати барањето на Обвинителството, таа веднаш ќе биде пренесена во истражниот затвор во Шутка.
Јанева добила мебел од 5.000 евра за да го ослободи Камчев од „Империја“
Јанева користејќи ја својата позиција за осомничен во истрагата на СЈО „Империја“ -Орце Камчев ги олеснила правните мерки кои биле преземени против него, односно му го укинала куќниот притвор и му го вратила пасошот за таа и нејзините пријатели да се стекнат со имотна корист. Освен тоа, Јанева е осомничена и дека договарала со Камчев спогодба за „Империја“ со тоа што случајот ќе се затвори, а Камчев ќе и плати незначителен износ оштета на државата.
Обвинителството како што рече Јовески уште на почетокот имале сознанија за инволвираноста на Јанева во случајот, но откако доказите се подгинале на повисок степен, истрагата е проширена и на неа.
Обвинителството досега има несоборливи докази дека Јанева била наградена со 298.000 денари во мебел, кој и го купил еден од осомничените.
-Уште од почетокот на истрагата централно прашање беше каде завршиле парите, но во овој момент во интерес на истрагата не можам да споделам повеќе информации, кажа Јовески.
Обвинителството не утврдило ниту една индиција дека парите завршиле надвор од земјата или кај домашни или странски политичари.
Полицијата денеска два пати вршеше претрес во домот на Јанева во Козле. Таа беше приведена попладнево од полицијата по налог на ЈО, а по претресот во нејзиниот дом беше одведена во канцеларијата во Специјалното јавно обвинителство, од каде со налог и беше одземен компјутерот. Потоа специјалната обвинителка повторно беше вратена во домот во Козле, од каде мебел и други предмети беа изнесени со камион. Претрес е вршен и во нејзината куќа во Гевгелија.
Сите сомнителни потези на Катица Јанева
За „Рекет“ притворот им е продолжен на Бојан Јовановски и Зоран Милески.