Обвинителството за организиран криминал бара 30 дена притвор за специјалната обвинителка Катица Јанева за злоупотреба на службената положба и овластувања во врска со случајот „Рекет“.
Јанева нема имунитет и доколку судот го прифати барањето на Обвинителството, таа веднаш ќе биде пренесена во истражниот затвор во Шутка.
Јанева користејќи ја својата позиција за осомничен во истрагата на СЈО „Империја“ -Орце Камчев ги олеснила правните мерки кои биле преземени против него, односно му го укинала куќниот притвор и му го вратила пасошот за таа и нејзините пријатели да се стекнат со имотна корист. Освен тоа, Јанева е осомничена и дека договарала со Камчев спогодба за „Империја“ со тоа што случајот ќе се затвори, а Камчев ќе и плати незначителен износ оштета на државата.
Притворот бил укинат на 27 декември 2018 откако осомничените Бојан Јовановски и Зоран Милески кои се во притвор, договориле со Камчев исплата на 8 милиони евра за негово ослободување. На 20 февруари 2019 тие дошле во домот на Камчев и од него зеле 1 милион евра кои биле ставени во чанта „Луј Витон“, како што се гледа на снимките објавени од италијанскиот весник Ла Верита.
Биле земени и уште 500.000 евра од сопругата на Камчев, додека тој бил во притвор, но на прашањето дали Јанева директно била вклучена во договарањето на оваа сума, јавниот обвинител Љубомир Јовески само кратко искоментира дека „имало континуитет на дејствијата“.
Обвинителството досега има несоборливи докази дека Јанева била наградена со 298.000 денари во мебел, кој и го купил еден од осомничените.
-Уште од почетокот на истрагата централно прашање беше каде завршиле парите, но во овој момент во интерес на истрагата не можам да споделам повеќе информации, кажа Јовески.
Обвинителството не утврдило ниту една индиција дека парите завршиле надвор од земјата или кај домашни или странски политичари.
Сите сомнителни потези на Катица Јанева
Обвинителката Вилма Рускоска која го води случајот не сакаше да коментира за тоа каде е синот на Јанева, затоа што како што рече се собираат доказа за негова инволвираност.
Обвинителството како што рече Јовески уште на почетокот имале сознанија за инволвираноста на Јанева во случајот, но откако доказите се подгинале на повисок степен, истрагата е проширена и на неа.
Орце Камчев во овој случај се води како сведок на истрагата.
По налог на Обвинителството за организиран криминал во СЈО се одземаат предмети кои ги користела Јанева, меѓу кои и компјутерот.
Од СЈО со полициска придружба попладнево Јанева повторно беше вратена во нејзиниот дом во скопската населба Козле каде беше извршен претрес, по што со камион беше изнесен мебелот и други предмети, а претрес бил направен и во куќата во Гевгелија. Јанева доцна попладнето беше донесена во Кривичниот суд.
По четиричасовен распит, судијата на претходна постапка и одреди 30 дневен притвор на Јанева поради опасност од бегство, влијание врз сведоци и уништување докази.
Русковска: Притворот за Јанева беше неопходен
Таа доцна вечерва беше пренесена во истражниот затвор во Шутка. Утре со полициска придружба таа ќе присуствува на погребот на нејзината мајка во Гевгелија, која починала утрово.