Специјалната јавна обвинителкa Катица Јанева одговарајќи на прашања поставувани цел час од пратеничката Владанка Авировиќ порача дека шестмесечниот Извештај на 16 страници е слика за работата на СЈО и дека во однос на финансиите таа понатаму нема да образложува.
– Јас не сум Супермен, ја сум човек, а извештајот е слика за работата на СЈО. Истражувањата утврдија дека досега дека во изминативе 10 години ниту еден обвинител не го образложувал вака Извештајот, а во последните пет години никој не поднел. Драго ми е што некои институции конечно се разбудија од кома како Врховен суд, Судскиот Совет и Јавнообвинителскиот совет. Да се испита работата на овие институции и сакам да порачам, сите институции кои ја омаловажуваат работата на СЈО, во име на Уставот и законите ќе се избориме со сите опструкции и ќе се потрудиме правосудната фела да се врати во судниците и ќе почне да владее правото, рече Јанева.
Пратеничката Авировиќ еден саат бараше од говорница одговор од обвинителката Јанева за тоа зошто и се потребни експерти, зошто ангажирала луѓе, за кои вели дека, биле блиски до опозицијата и колкави се нивните плати.
Авировиќ праша дали потребата од советници е поради нестручноста на СЈО, а најде забелешка и за тоа што СЈО го употребува терминот мисија во своето работење.
Јанева одговори дека ниту еден експерт не сакал паричен надоместок.
– Правните експерти се ангажирани согласно член 15 од Законот за СЈО и ништо не е спротивно на овој закон или на другите закони. Ве информирам за ваше познавање, дека луѓето кои се ангжирани, ниту еден од нив не сака паричен надоместок напротив, јас инсистирам на тоа. Прво, за начело на доверливост, затоа што работат со доверливи материјали, а понатаму сметам дека секој треба да биде платен за својот труд.
Седницата е во тек.