Гордана Јанкулоска, поранешна министерка за внатрешни работи сведочeше на денешното рочиште во судскиот предмет Плацеви на Водно и тоа за периодот кога таа ја извршувала функцијата генерален секретар на ВМРО ДПМНЕ, а во врска со финансирањето на партијата.
– Имаше масивни сефови од 1,5 метри во седиштето на партијата, рече Јанкуловска која одговараше на прашања на обвинителката во овој процес Лиле Стефанова која побара од сведокот да ги каже своите сознанија за начинот на кој се финансирала партијата во контекст на тезата на обвинението дека Груевски ги купил плацевите на Водно со пари од чланарината.
– Одредени сознанија можам да дадам од есента во 2004 до 2006 година. додека ја извршував функцијата генерален секретар на ВМРО ДПМНЕ, во периодот кога партијата беше во опозиција и за цело време имаше блокирана сметка и функционираше од донации од физички лица, рече Јанкулоска напоменувајќи дека на некои од донаторите им издавале каса прими.
Колку пари му биле дадени на Груевски, праша Стефанова, а Јанкуловска на тоа одговори дека не знае колку пари му биле предадени на Груевски и дека знае само за сумата што и била давана на неа.
Јанкулоска објасни дека во времето законската регулатива била како што рече, полабава и дека се водела неформална евиденција, и затоа на некои донатори им давале и каса прими. Таа додаде дека во нејзината канцеларија во старото партиско седиште имало два големи сефа.
– Имаше два сефа, од кои едниот беше од тие што се големи, масивни, до метар, 1,5 метар високи, и имаше еден мал како каса. Во малиот се чуваа мали износи, тие што се користеа на дневна основа. Другиот, барем додека јас бев на функција, ниту бил отворан ниту знаев шифра. Тој малиот беше со шифра и клуч, се отвораше по потреба, појасни Јанкуловска.
Обвинителката Стефанова ја праша Јанкулоска дали кога донаторите му ги давале паричните средства на претседателот на партијата таа имала евиденција колку пари се дадени од одреден донатор, сведокот рече дека имала сознанија и евиденција за тоа колку пари ќе и се предадат, а дали се разговарало за повеќе или за помалку пари не знае, ниту пак дека знае колку му биле давани на Груевски.
Груевски е првообвинет и му се суди во отсуство во предметот „Плацови на Водно“. Обвинението го терети дека во периодот од јуни 2006 до октомври 2012 година, Груевски како лидер на партија наместо да прикаже пари како донации во ВМРО-ДПМНЕ, за себе прибавил 1,3 милиони евра кои потоа ги пуштал во оптек и купувал парцели на Водно. Во овој судски предмет се обвинети и бизнисменот Орце Камчев, неговата мајка Ратка Куновска-Камчева, Сашо Мијалков, Ристо Новачевски и Ненад Јосифовиќ.
Стојанка Митреска