Јанкуловска им се закани на неистомислениците
Министерката за внатрешни работи Гордана Јанкуловска, денеска, од обраќањето по повод Денот на полицијата им упати порака на „инструментализирани самонаречени невладини организации или политичари“.
-Тие, ниту имаат, ниту ќе имаат мандат личните фрустрации да ги лекуваат со уривање. Се обидоа да ги деградираат припадниците на безбедносните сили, враќањето на Јохан Тарчуловски, а деновиве повторно го актуелизираат и рушењето и дислоцирањето на спомениците на сите бранители и херои на Македонија.
Тоа што не можат да ја видат големината на спомениците на бранителите, на Гоце, Даме или останатите великани кои се жртвуваа за Македонија, само говори колку се тие мали.
Затоа на овој ден, во мое лично име и во име на вработените во МВР сакам да им порачам дека тоа што самите не успеале нешто да изградат или да остават трага во историјата на земјава, не им дава право да ги уништуваат сеќавањата на оние кои со крв ги запишале своите имиња.
Нема да дозволиме децата, сопругите и мајките на нашите колеги што ги жртвуваа животите во 2001 година да бидат сведоци како некој варварски се обидува да ги збрише паметниците на нивната жртва. Но, и покрај се, полицајците остануваат верни на својата функција и секојденвно се грижат за безбедноста на народот“, рече Јанкуловска.
Извор: ТВ Телма