Со Деветтата симфонија на Бетовен на 21-ви јуни во Македонската опера и балет свечено ќе биде отворено 34-то издание на „Скопско лето“.
Диригент на концертот ќе биде Шунго Моријама, а ќе настапат хористите и оркестарот од МОБ. Составот ќе биде надополнет со учество на хорски уметници од Јапонија.
Како што информираат од МОБ ќе настапат и двајца наши уметници, тенорот Ѓорѓи Цуцковски и мецосопранот Ирена Кавкалеска, како и сопранот Еми Хишики и баритонот Кеизуке Танака од Кјото, Јапонија
Мирко Стефановски од Дирекцијата за култура и уметност-Скопје како организатор на Меѓународната манифестација „Скопско лето“ информира дека на 25 јули во МОБ ќе настапи Кинескиот симфониски оркестар со 90 музичари.
Годинава културните настани ќе се одржуваат на повеќе од 20 локации.
Ќе има изложби на фотографии, концерти, театарски претстави, музички настани, промоции на книги, кафе-кино.
Предвидено е учествo на гости од соседството, од Европа и од повеќе континенти.
Новиот плакат на Скопско лето е ликовно решение на Виолета Коцев.