Расте бројот на акутно гладни луѓе и се предвидува дека во 2018. Јемен ќе остане земја во која најмногу недостасува храна, предупредуваат од ОН.
Во глобалниот извештај за прехранбена криза е наведено дека минатата година се регистрирани 124 милиони акутно гладни луѓе. Овој број е зголемен во однос на статистиките од 2016 година кога бројот изнесувал 108 милиони лица.
Порастот се должи на сушата која погоди неколку африкански земји како и на новите и се повеќе интензивни судири во Нигерија, во Јужен Судан, во Мјанмар и Јемен.
Глобалниот извештај за прехранбена криза е годишен меѓувладин извештај на агенциите на Обединетите нации, Европската Унија и организации кои се занимаваат со прехранбена политика.
Овој проект е започнат во 2016 година со цел да се промовира поголема координација помеѓу агенциите.