Три дена по неуспешниот државен удар, турската влада доцна синоќа го повика населението да остане мобилизирао додека во земјата се вршат масовни апсења во армијата и судството, нешто што предизвикува загриженост кај западните земји.
Илјадници граѓани синоќа се собраа на плоштадот Таксим во Истанбул и на главниот плоштад во Анкара во знак на поддршка на претседателот на Турција, Реџеп Таип Ердоган, кој го повтори апелот граѓаните да излезат на улиците и покрај поразот на пучистите.
Истиот повик доцна во ноќта на митинг во Анкара го повтори и турскиот премиер Бинали Јилдирим.
-Во текот на денот ќе работиме, а во вечерните часови, по работа, ќе бидеме на јавни места, рече турскиот премиер.
Според последните информации во текот на бутнот убиени се 290 луѓе, а 1.440 се ранети.
Во рамки на истрагата досега се уапсени 6.000 луѓе, а над 8.000 полицјаци добиле отказ за кои властите се сомневаат дека се поврзани со неуспешниот обид за соборување на Ердоган.
Ердоган синоќа ја спомена можноста за повторно воспоставување на смртната казна, која официјално беше укината во 2004 година како дел од кандидатурата за членство во Европската унија.
Исламскиот проповедник и прв опонент на турскиот претседател Ердоган, Фетула Ѓулен, смета дека воениот удар е дело на самиот претседател, но дека тој би ја прифатил евентуалната екстрадиција доколку Американците го испорачаат во Турција.
Денеска еврокомесарот за проширување и соседска политика, Јоханес Хан изјави дека експресното приведување судии и други лица по неуспешниот обид за преврат во Турција покажува дека Владата во Анкара имала претходно подготвен список „за отстрел“.
„Изгледа како нешто што било подготвено однапред. Списоците биле на располагање што укажува на тоа дека биле подготвни да се искористат во одредена фаза”, рече Хан.