Во вчерашната несреќа кај Рампа во скопската населба Кисела Вода, во која тешко повреден е мотоциклистот при удар од БМВ, јавен обвинител иако бил известен не излегол на лице место да изврши увид.
Ова е нотирано во записникот до кој дојде НОВА, во кој полициските службеници навеле дека јавен обвинител не излегол на лице место и настанот го препуштил на увидната екипа.
Од Државното јавно обвинителство за НОВА велат дека Законот за кривична постапка дава можност обвинителот сам да процени дали ќе се појави на лице место. Според нив тоа нема да биде пречка за истрагата.
-Согласно Законот за кривична постапка, јавниот обвинител одлучува дали ќе раководи со увидот на лице место на сторено кривично дело или истиот ќе го препушти на увидната екипа. Дополнително, со подзаконски акти се предвидени сите кривично-правни настани за кои со увидот на лице место задолжително раководи јавен обвинител.
Со оглед на тоа што во конкретниот случај не станува збор за сообраќајна несреќа со смртни последици, овој настан не спаѓа во листата на оние на кои задолжително со увидот на лице место раководи јавен обвинител. Неприсуството на јавен обвинител на лице место воопшто не претставува пречка за истрагата, велат од Обвинителство.
Оттаму наведуваат дека се во постојана комуникација и со екипата која го извршила увидот, но и со медицинскиот персонал кој ја следи состојбата на повредениот.
Обвинителството уште ги очекува записниците од МВР, резултатите од направените анализи на примероци од крв и урина од учесниците во сообраќајната несреќа, скиците и фотодокументацијата од терен. Од овие резултати ќе зависи натамошниот тек на постапката.
Во сообраќајката која вчера во 00:30 се случи кај Рампа во скопската населба Кисела Вода при судир на автомобил БМВ со мотоциклист, тешко повреден беше мотоциклистот Стојанчо Андонов (22), кој се уште се бори за живот.
-Состојбата на момчето е непроменета, тој е на интензивна нега и во животно загрозувачка состојба, изјави за НОВА директорката на болницата Јасмина Чабуковска.
Со автомобилот управувал познатиот телохранител на екс премиерот Никола Груевски , Дејан Митревски – Урко. Во билтенот на МВР се вели дека Урко преминал на спротивната коловозна лента и во него удрил мотоциклистот.
Како што вчера објави 24 Вести, семејството на повреденото момче изјавило дека ноќта по сообраќајката Урко постојано бил со семејството на момчето во болница. Според семејството на повреденото момче, тој бил свесен дека му го пресекол патот на мотоциклистот.