Александар Јончевски, в.д. тренер на МЗТ Скопје, е задоволен што неговата екипа, конечно, ја прекина низата од пет порази во АБА лигата или шест во новата сезона земајќи го предвид и оној во Литванија од Лиеткабелис во Еврокупот. Македонскиот кошаркарски шампион го совлада Карпош Соколи со 74:71 во шестото коло во регионалното натпреварување и со подобрена самодоверба го дочекува ФИБА настапот против Цедевита во среда на домашен терен.
„Тежок натпревар. По серија од пет-шест порази е тешко да се игра против секого. Притисокот беше на наша страна бидејќи ние сме дел од оваа лига пет години, а тие се дебитанти. Успеавме да се справиме, успеавме да издржиме. Една-две топки можеби беа решавачки, но успеавме да се вратиме во игра и да завршиме со позитивен резултат“, вели, засега, привременото тренерско решение на клупата на „металците“.
Почетокот на мечот мина во знак на гостите од Карпош кои ја добија првата четвртина со 17 коша разлика (8:25). Аеродромци одговорија со две убедливи во продолжението. Се „стегнаа“ во одбрана во втората (16:6) и третата во која беа особено ефикасни и во напад (24:11) за целосен пресврт. Завршната повторно во корист на гостите (26:29) што, сепак, не беше доволно да избегнат пораз во СЦ „Јане Сандански“. Клоф со 14 поени беше најефикасен кај МЗТ Скопје, Пери кај „соколите“ и воопшто во мечот со 22.
„На ден пред мечот се повреди Марко Симоновски, проблеми и со Мекиќ. Во финишот на средбата останавме и без Клоф кој дотогаш одигра солидно. Сè уште не знае од каква природа е повредата и дали и колку ќе паузира. Иако настапи со само два тренинга, придонесот на Даниел Кларк беше од големо значење“, додаде Јончевски.
Во наредното коло во АБА лигата, МЗТ Скопје ќе ѝгостува на екипата на Мега Лекс (недела, 19 ч.), Карпош Соколи ќе биде домаќин на Унион Олимпија (понеделник, 21 ч.).
АБА лига
Резултати, 6. коло
МЗТ Скопје – Карпош Соколи 74:71
Ц. звезда – Игокеа 68:66
Цедевита – Крка 82:83
ФМП Железник – Партизан 56:65
Будуќност – Морнар 85:68
Задар – Мега Лекс 90:86
Унион Олимпија – Цибона 72:89
Табела: Ц. звезда (6 поб.-0 пор.), Будуќност (6-0), Партизан (6-0), Цибона (5-1), Цедевита (3-3), Игокеа (3-3), Задар (3-3), Морнар (2-4), ФМП Железник (2-4), Крка (2-3), Мега Лекс (1-5), МЗТ Скопје (1-5), Унион Олимпија (1-4), Карпош Соколи (0-6).