„Можеби јас не сум објективен – нека излезе премиерот на улица, нека им каже на луѓето дека сме четврта економија во Европа, па да видиме како ќе реагираат“, вели тој.
Дехран Муратов
Да, Македонија навистина е четврто место во Европа по економски развој. Ама од позади. Само Молдавија, Косово и Босна се помалку развиени од нас. И Албанија беше, ама лани нѐ престигна, вели професорот Бранимир Јовановиќ за ЦИВИЛ Медиа, откако вчера премиерот Христијан Мицкоски соопшти дека Северна Македонија е четврта економија во ЕУ.
„Македонскиот БДП по жител, според куповната моќ, е само 42% од просекот на ЕУ. Албанија е на 43%, Србија е на 51%, Црна Гора на 53%. Јас тука навистина не гледам ништо за радување“, вели Јовановиќ.
Јовановиќ вели дека вакви слични приказни – дека сме трета економија во светот – имаше и Груевски пред десетина години, па гледаме каде дојдовме од сето тоа. Според него, жално е што оваа влада почнува толку многу да наликува на таа.
„Можеби јас не сум објективен – нека излезе премиерот на улица, нека им каже на луѓето дека сме четврта економија во Европа, па да видиме како ќе реагираат“, вели тој.
Професорот Јовановиќ додава дека она што е можеби уште потажно е што дури ни за овој раст од првиот квартал од 3% не може да се каже дека е четврти во Европа. Многу земји сѐ уште немаат објавено податоци за првиот квартал, посебно оние блиску до нас, кои обично имаат висок раст, како Албанија, Косово, Црна Гора, Босна, Турција, Романија.
Дури и од оние кои има објавено податоци, вели тој, четири веќе имаат повисок раст од 3% – Ирска, Данска, Полска и Литванија, а две имаат точно 3% – Кипар и Малта.
„Наместо да пласира вакви полувистини, би му препорачал на премиерот да се зафати со работа, и да почне да ги реализира проектите кои толку бомбастично ги најавуваше. Од унгарската милијарда ништо не видовме, државните капитални инвестиции никогаш не се реализирале послабо, автопатот кон Охрид стои, за железницата која викаат ќе ја градат со британскиот заем не знаеме ни дали има проект. Кога ќе изградат“, истакна Јовановиќ.
Од Владата на Република Северна Македонија велат дека промените во Северна Македонија се случуваат и тоа станува сè повидливо и појасно, македонската економија доживува ренесанса. Македонија е меѓу петте земји со најбрзорастечки економии во Европа. 3,4 проценти е растот на Бруто домашниот производ за првото тримесечје за 2025 година, согласно прелиминарните податоци на Државниот завод за статистика.
„Со тоа, практично на досега објавените параметри коишто ги објавил „Евростат“, македонската економија е рангирана на четврто место, веднаш позади Ирска, Данска и Полска“, рече вчера премиерот Мицкоски.
Текстот е сопственост на ЦивилМедиа