Венус Вилијамс ги распрсна сништата на Марија Сакари за прво гренслем осминафинале во кариерата. Американската ветеранка триумфира со 6:3, 6:4 и закажа дуел со Карла Суарез Наваро во топ 16 фазата на Ју-Ес опен.
Повозрасната од сестрите Вилијамс, која синоќа стана тетка (се породи Серена), беше преголем залак за единствената грчка тениска претставничка во Њујорк во двете поединечни конкуренции и двете во двојки (женски и мешани). Сакари посакуваше и се надеваше дека е можна реприза на успехот на Елени Данилиду од 2004 година на истиот овој турнир, но желбите и реалноста не секогаш одат заедно.
Венус Вилијамс го скрши отпорот на 95 светска тенисерка со својот сервис. Дури 75 од првите удари ги претвори во поени и со длабочински топки успешно ја држеше Сакари далеку од мрежата. Притоа направи и 24 неизнудени грешки меѓутоа ги искористи четирите брејк прилики и обезбеди пласман во четвртото коло на Ју-Ес опен, турнир што го освојуваше двапати во минатото. Со своите 37 години е највозрасна тенисерка на женскиот дел од гренслемот што, сепак, не и се пречка да докаже дека може и до, намјалку, трето гренслем полуфинале во 2017 година по Австралија опен и по Вимблдон.
Нова уверлива партија на Мугуруза за убедлива победа над Рибарикова
Гарбиње Мугуруза и по третпат ја потврди одличната форма во која се наоѓа. Шпанската тенисерка загуби само два гема во мечот со Магдалена Рибарикова (6:1, 6:1) за што ѝ беа потребни 61 минута. Најголемата фаворитка за преземање на приматот на Анџелик Кербер во Њујорк и овојпат импресионира со силниот сервис, со агресивните ритерни и офанзивната игра со чести излегувања на мрежа.
„Во секој меч влегувам како да е финале. Раните фази на турнирите се секогаш тешки и кријат опасности. Затоа сум фокусирана да одиграм најдобро што знам и можам и на секој настап му приоѓам со цел да победам. Постојано очекувам од противничките да заиграат добро, затоа и јас не се опуштам“, рече Мугуруза која во наредното коло ќе се пресмета со Петра Квитова.
Машкиот турнир остана и без Марин Чилиќ
Хрватскиот тенис остана без последните три адути на Ју-Ес опен. Ако елиминациите на Дона Векиќ и на Борна Чориќ не е особено изненадувачка, тогаш поразот на Марин Чилиќ и тоа како се вбројува во редот на сензации. Петтиот носител го заврши учеството на турнирот по дуел со Диего Шварцман. Аргентинецот славеше со 4:6, 7:5, 7:5, 6:4 за дополнително расчистување на патот до полуфинале за Роџер Федерер и Рафаел Надал.
Јужноафриканецот Кевин Андерсон, претходно, го порази Чориќ со 6:4, 6:3, 6:2, судбина каква што доживеа и неговата сонародничка Дона Векиќ во мечот со Летонката Севастова (2:6, 3:6).
Ју-Ес опен – натпреварувачки ден 5
Жени, 3 коло
Мугуруза (3., Шпанија) – Рибариков (Словачка) 6:1, 6:1
В. Вилијамс (9., САД) – Сакари (Грција) 6:3, 6:4
Квитова (13., Чешка) – Гарсија (18., Франција) 6:0, 6:4
Севастова (16., Летонија) – Векиќ (Хрватска) 6:2, 6:3
Гергес (30., Германија) – Круниќ (Србија) 6:3, 6:3
Стивенс (САД) – Барти (Австралија) 6:2, 6:4
Суарез Наваро (Шпанија) – Макарова (Русија) 6:1, 3:6, 6:3
Мажи, 3 коло
Карено Буста (12., Шпанија) – Мау (Франција) 6:3, 6:4, 6:3
Пуј (16., Франција) – Кукушкин (Казахстан) 2:6, 6:3, 6:4, 6:4
Квери (17., САД) – Албот (Молдавија) 4:6, 6:2, 6:4, 6;4
Андерсон (28., Ј. Африка) – Чориќ (Хрватска) 6:4, 6:3, 6:2
Шварцман (29., Аргентина) – Чилиќ (5., Хрватска) 4:6, 7:5, 7:5, 6:4
Шаповалов (Канада) – Едмунд (В. Британија) 3:6, 6:3, 6:3, 1:0 – Едмунд го предаде мечот
Лоренци (Италија) – Фабијано (Италија) 6:2, 6:4, 6:4