Вечерва во рамките на „Скопско лето“, во Македонскиот народен театар беше изведена театарската претстава „Вишновата градина“ на Чехов, во режија на Трајче Ѓорѓиев. Со оваа претстава, актерите Снежана Конеска- Руси и Томе Витанов, го одбележаа јубилејот – 40 години уметничка дејност.
Со улогата на Љубов Андреевна, една од најпожелуваните на секоја актерка, Снежана Конеска Руси ги одбележа четирите децении уметничка дејност.
Меѓутоа, наспроти јубилејот, таа вели дека на крилјата на сеќавањето има доволно сили и натаму стамено да продолжи да ги живее својот сон и јаве – театарот.
„Ние со Томе Витанов вака кажуваме збогум на стариот привремен објект, и како што вели Љубов Андреевна, одиме во новата зграда на Македонскиот народен театар. Тоа е најголемата причина зошто е одбрана „Вишновата градина“, а инаку таа како текст и како улоги е врв, не само во драматургијата на Чехов, туку воопшто и на светската драматургија, а секоја актерка посакува да ја изигра токму оваа ролја. Случајот сакаше нејзе да ја одигра и Снешка“, вели актерката во изјава за Радио Слободна Европа.