Јужна Африка одлучи да се повлече од Меѓународниот кривичен суд, обвинувјаќи го за „предрасуди кон Африка и Африканците“. Оваа одлука доаѓа по спорот минатата година, кога владата во Преторија одби да го уапси суданскиот претседател Омар ал Башар, за кого Судот има распишано потернца под обвинение за геноцид и воени злосторства.
Во 2015 година, ал Башар беше во Јоханесбург на Самитот на земјите од Африканската унија.
Тој ги отфрла обвинувањата на Судот и тврди дека немало геноцид, ниту воени злосторства во западниот судански регион Дарфур.
Правни експерти во Преторија тврдат дека Јужна Африка не може да се повлече од Судот, со одлука на едно Министерство или на Владата и дека за тоа е потребна и согласност на Парламентот.
Во судот членуваат 123 земји, а во текот на своето постоење има покренато доста постапки и судски процеси против Африканци.
Последен таков процес беше против претседателот на Кенија, Ухуру Кенијата, но тој пропадна поради недостиг на докази.